تبلیغات
anadilimiz=varlığımız - یاغدی یاغیشلار : بهرام اسدی4

عیب

من نه کارا نه کورا

نه کچله چوپورا

هئچ کیمه عیب ائتمرم

هئچ کیمی اینجیتمرم

چون منه اتام دئییب

هئچ کیمه توتما عیب

عیب توتماق عیب دیر

عیبی او پیس دئییبدیر

********************

معللیم

بالاجا اوغلانیدیم

ائویمیزده خان ایدیم

آلتی یاشیم بیتنده

مکتب واختی یئتنده

آتام منه کیف آلدی

منی یانینا سالدی

آپاردی مدرسه یه

آدیمی یازسین دئیه

آدیم کئچدی دفتره

باخیردیم قلملره

بیلمیردیم نه دیر یازی

نئجه یازیم کاغاذی

نئچه واخت گئددیم اورا

قول قویدوم کاغاذلارا

یازینی بیلدیم داحی

شوکر ائله دیم آللاهی

آدیمی یازا بیله یدیم

یازینی پوزابیله یدیم

بونو کیم اؤیره تدی کیم

محببت لی معللیم

********************

اوش چیراخ

بیز بو شهرین

اوغلانی قیزی

تانیریق یاشیل

ساری قیرمزی

هر خیابانین

باشینا باخاق

گؤره ریک اوردا

اوچ دانا چیراق

یاشیل یاناندا

یولدان کئچیریک

بواوچ چیراقدان

اونو سئچریک

ساری چراغی

گؤرنده تیز تیز

بو خیابانی

بشالداریق بیز

تیز دایاناریق

گؤرسک اوزاقدان

چونکی قورخوروق

قیرمز چراقدان

********************

کوسمک

هر گون آخشام اوشاخ تک

کوسوب گئدیر بو گونش

اوفوق لاردا عالمین

ترکین ائدیر بو گونش

هر گون سحر اوتانجاق

داغدان بویلانیر گونش

دوننکی کوسدویونده ن

سانکی اوتانیر گونش

اوتاندیقجا قیزاریر

بویلانیر ائمیل – ائمیل

کوسمه آی گونش داهی

کوسمک خوش صنعت دییل

********************

ساحات

ها توولانیر تولانیر

فیر فیرا تک فیرلانیر

توولاماسی اوچدو اوچ

دئمه ایشی پوچدو پوچ

بؤیوک  گئدیر آستا جا

خیردا گئدیر اوستاجا

ها یول گئدیر یول گئدیر

دولانباجی سئیر ائدیر

اؤز باشینا دولانیر

نه بئزیر نه اوسانیر

یاتانلاری اویاتدی

ساحاتدیر او ساحاتدیر

********************

حب الوطن

گونلرین بیر گونونده

یازا یاخین بیر گونده

گؤی بیر چمن واریدی

اوردا بیر,,ده ن,, واریدی

دن اوز دوتدو چمنه

دئدی قولاغ آس منه

یوردوموزا یاز گلیر

مین نغمه آواز گلیر

یوخ خبرین خبرده ن

قوشلار گلیر سفرده ن

چمن سوروشدو ده ن ده ن

بیر سؤز سوروشدوم سنده ن

ایندیکی دویغون نه دیر؟

یازداکی آرزین نه دیر؟

ده ن دئدی آرزوم بودور

بو منده بیر آرزودور

منده بیر قوش اولایدیم

گؤیده قاناد چالایدیم

بوردا یئریم یاشدی یاش

تورپاخدیر منه یولداش

گؤیده اوچا بیله یدیم

قاناد آچا بیله یدیم

بو واخ بیر آلا قارقا

چمنلیکلره دارقا

ده نی آلدی دیمدییه

ده نله ییب اوچدو گؤیه

اوجالدی گؤیلره ده ن

باخیردی آونا چمن

اوچدو آسمانیندا

قارقا چینه دانیندا

چمن حسرتین یئدی

بیر دؤنوب بئله دئدی

بیر واخ وطن یاش اولار

بیر واخ دولی داش اولار

تورپاغ اولار کول اولار

بیر واخ چیچک گول اولار

تورپاخدان اوزوله ن لر

اولماز اوزو گولن لر

تورپاخدا کؤک سالانلار

اولدو بوردا قالانلار

مه حو اولمازایدی او ده ن

بیلسه ایدی حب الوطن

********************