تبلیغات
anadilimiz=varlığımız - مطالب شهریارşəhryar
1390/06/10

خان ننه

   یازان: araz azeri turk    بولوم :شهریارşəhryar ،

خان ننه

 

خان ننه ، هایاندا قالدین

بئله باشیوا دولانیم

نئجه من سنی ایتیردیم !

دا سنین تایین تاپیلماز

...

سن اؤلن گون ، عمه گلدی

منی گه تدی آیری کنده

من اوشاق ، نه آنلایایدیم ؟

باشیمی قاتیب اوشاقلار

نئچه گون من اوردا قالدیم

...

قاییدیب گلنده ، باخدیم

یئریوی ییغیشدیریبلار

نه اؤزون ، و نه یئرین وار

« هانی خان ننه م ؟ » سوروشدوم

دئدیلر کی : خان ننه نی

آپاریبلا کربلایه

کی شفاسین اوردان آلسین

سفری اوزون سفردیر

بیرایکی ایل چکر گلینجه

...

نئجه آغلارام یانیخلی

نئچه گون ائله چیغیردیم

کی سه سیم ، سینم توتولدو

...

او ، من اولماسام یانیندا

اؤزی هئچ یئره گئده نمه ز

بو سفر نولوبدو ، من سیز

اؤزو تک قویوب گئدیبدیر ؟

...

هامیدان آجیق ائده ر کن

هامییا آجیقلی باخدیم

سونرا باشلادیم کی : منده

گئدیره م اونون دالینجا

...

دئدیلر : سنین کی تئزدیر

امامین مزاری اوسته

اوشاغی آپارماق اولماز

سن اوخی ،  قرآنی تئز چیخ

سن اونی چیخینجا بلکی

گله خان ننه سفردن

...

ته له سیک روانلاماقدا

اوخویوب قرآنی چیخدیم

کی یازیم سنه : گل ایندی

داها چیخمیشام قرآنی

منه سوقت آل گلنده

آما هر کاغاذ یازاندا

آقامین گؤزو دولاردی

سنده کی گلیب چیخمادین

نئچه ایل بو اینتظارلا

گونی ، هفته نی سایاردیم

تا یاواش – یاواش گؤز آچدیم

آنلادیم کی ، سن اؤلوبسن !

...

بیله بیلمییه هنوزدا

اوره گیمده بیر ایتیک وار

گؤزوم آختارار همیشه

نه یاماندی بو ایتیکلر

...

خان ننه جانیم ، نولیدی

سنی بیرده من تاپایدیم

او آیاقلار اوسته ، بیرده

دؤشه نیب بیر آغلایایدیم

کی داها گئده نمییه یدین

...

گئجه لر یاتاندا ، سن ده

منی قوینونا آلاردین

نئجه باغریوا باساردین

قولون اوسته گاه سالاردین

...

آجی دونیانی آتارکن

ایکیمیز شیرین یاتاردیق

یوخودا ( لولی ) آتارکن

سنی من بلشدیره ردیم

گئجه لی ، سو قیزدیراردین

اؤزووی تمیزلیه ردین

گئنه ده منی اؤپه ردین

هئچ منه آجیقلامازدین

...

ساواشان منه کیم اولسون

سن منه هاوار دوراردین

منی ، سن آنام دؤیه نده

قاپیب آرادان چیخاردین

...

ائله ایستیلیک او ایسته ک

داها کیمسه ده اولورمو ؟

اوره گیم دئییر کی : یوخ – یوخ

او ده رین صفالی ایسته ک

منیم او عزیزلیغیم تک

سنیله گئدیب ، توکندی

...

خان ننه اؤزون دئییردین

کی : بهشت ده ، الله

وئره جه ک نه ایستیور سن

بو سؤزون یادیندا قالسین

منه قولینی وئریبسه ن

ائله بیر گونوم اولورسا

بیلیرسن نه ایستیه رم من ؟

سؤزیمه درست قولاق وئر :

( سن ایله ن اوشاخلیق عهدین )

خان ننه آمان ، نولیدی

بیر اوشاخلیغی تاپایدیم

بیرده من سنه چاتایدیم

سنیلن قوجاقلاشایدیم

سنیلن بیر آغلاشایدیم

یئنیدن اوشاق اولورکن

قوجاغیندا بیر یاتایدیم

ائله بیر بهشت اولورسا

داها من اؤز الله هیمدان

باشقا بیر شئی ایسته مزدیم

آتا شهریار


1390/06/10

Xan nənə

   یازان: araz azeri turk    بولوم :شهریارşəhryar ،

Xan nənə

Xan nənə !hayanda qaldın

Belə başıva dolanım

Necə mən səni itirdim?

Da sənin tayın tapılmaz

Sən ölən gün əmmə gəldi,

Məni getdi ayrı kəndə

Mən uşaq nə anlıyaydım?

Başımı gatıp uşaqlar

Neçə gün mən orda galdım.

Gayıdıp gələndə baxdım

Yerivi yığışdırıplar

Nə özün və nə yerin var.

"Hanı Xan nənəm?"-Soruşdum.

Dedilər ki, Xan nənəni

Aparıplar Kərbəlayə

Ki şəfasın ordan alsın

Səfəri uzun səfərdir

Bir iki il çəkər gəlincə

Necə ağlaram yanıxlı ?

Neçə gün elə çığırdım,

Ki səsim, sinəm tutuldu

O mən olmasam yanında,

Özü heç yerə gedənməz

Bu səfər nolupdı mensiz

Özü tək goyup gedipdi ?

Hamıdan acığ edərkən

Hamıya acığlı bakdım

Sonra başladım ki:Mən də

Gedirəm onun dalınca

Dedilər səninki tezdir.

İmamın məzarı üstdə

Uşağı aparmag olmaz.

Sən oxu Qur'anı tez çıx

Sən onu çıxınca bəlkə

Gələ xan nənən səfərdən

Təlesik ravanlamaxda

Oxuyup Qur'anı çıxdım

Ki yazım sənə: Gəl indi

Daha çıxmışam Qur'anı

Mənə sovgət al gələndə

Amma hər kağaz yazanda

Ağamın gözü dolardı

Sən də ki, gəlip çıxmadın

Neçə il bu intizarla

Günü həftəni sayardım

Ta yavaş-yavaş göz açdım

Anladım ki, sən ölüpseən

Bilə-bilmiyə henüz de

Ürəyimdə bir itik var

Gözüm axtarır həmişə.

Nə yamandı bu itiklər

Xan nənə, canım nolaydı

Seni bir də mən tapaydım

O ayaglar üstə bir də

Döşənip bir ağlayaydım

Golu halgə salmış ip tək

O ayağı bağlıyaydım

Ki, daha gedənmiyeydin

Gecələr yatanda, sən də

Meni goynuva alardın

Necə bağrıva basardın ?!

Golun üstə gah salardın

Acı dünyanı atarkən

İkimiz şirin yatardıx

Yuxuda löley atarkən

Səni mən bələşdirərdim

Gecəli, su gızdırardın

Özüvü təmizleyərdin

Gene də məni öpərdin

Heç mənə acıxlamazdın

Savaşan mənə kim olsun

Sən mənə havar durardın

Məni sən anam döyəndə

Gapıp aradan çıkardın.

Elə istilik o istək ?!

Daha kimsədə olarmı ?!

Ürəyim deyir ki: Yox, yox

O dərin səfalı istək

Mənim o əzizliyim tək

Sənilə gedip tükəndi

Xən nənə, özün deyərdin

Ki, sənə behiştdə Allah

Verəcək nə istiyürsən

Bu sözün yadında galsın

Mənə qolunu veripsən

Elə bir günüm olursa

Bilirsən nə istərəm mən ?

Sözümə dürüst gulax ver

"Senilə uşaxlıq əhdin

Xan nənə, aman nolaydı

Bir uşaxlığı tapaydım ?!

Bir də mən sənə çataydım

Sənilə gucaxlaşaydım

Sənilə bir ağlaşaydım

Yenidən uşağ olurkən

Gucağında bir yataydım

Elə bir behişt olursa

Daha mən öz Allahımdan

Başga bir şey istəməzdim

Şəhryar əmi


1390/06/10

zaman səsi

   یازان: araz azeri turk    بولوم :شهریارşəhryar ،

zaman səsi

 

sübh oldı hər tərəfdən ocaldı əzan səsi

guya gəlir məlaekələərdən quran səsi

 

bir səs tapanmıram ona bənzər ,  qoyün deyim:

bənzər buna əgr eşidilsəydi can səsi

 

sankı oşaqlıqım kimi nənimdə yatmışam

lay lay deyir mənə anamın mehriban səsi

 

sankı səfərdəyəm oyadırlar ki dür çatax

zəng şotor çalır  ,  keçərək karvan səsi

 

sankı çoban yayıb qüzüni dağda ney çalır

röya doğur qüzi qolağında çoban səsi

 

cismim qocalsada hələ eşqim qocalmayıb

cingildəyiـr hələ qolağımda cavan səsi

 

sankı zəman güləşədi məni güpsədi yerə

şerim yazım olub yıxılan pəhluan səsi

 

axır zamandı bir qolaq as ərşi titrədir

məltlərin harayı  ,  mədədi  ,  əlaman səsi

 

insan xəzanıdir tökülür can xəzəl kimi

saz tək xəzəl yağanda sızıldar xəzan səsi

 

qırx ildi dostağam qala bilməz o yağlı səs

yağsizsada qəbül elə məndən yəavan səsi

 

məndə səsim ucalsa gərəkdir  , yaman deyim

millət acıxlıdi ocalıbdı yaman səsi

 

doldür nəvarə qoy qala,  bir gün  ,  bu körpə lər

alqışlasınla zövqilə bizdən qalan səsi

 

miqnatıs olsa səsdə çəkər  ,  inqilabda bax

azadlıq aldı sərdarımın qəhrman səsi

 

insan qocalmış olsa  , qulaxlar ağırlaşar

sankı yazıq qolaxda  , gürüldür zəman səsi

 

bax bir dərin sukutə səhər  ,  hansı bir nəvar

zəbt eyliyə bilər belə bir cavdan səsi

sancır məni bu fışqa çalanlarda  "  şəhryar  "

mən niləyim ki fışqaya bənzər ilan səsi

 

 

 

زمان سسی

 

صبح اولدی هر طرفدن اوجالدی اذان سسی!

گـــویا گلیــــر ملائـکه لــــردن قــــرآن سسی!!!

 

 

بیر سس تاپانمیـــرام اونا بنزه ر، قویون دئییم:

بنزه ر بونا اگـر ائشیدیلسیدی جـــان سسی !!!

 

سانکی اوشاقلیقیم کیمی ننیمده یاتمیشام …!

لای لای دئییر منه آنامیـــن مهربـــان سسی !

 

سـانکی سفرده یم اویادیــرلار کی دور چاتاخ!

زنگ شتر چالیر ، کئچه رک کـــاروان سسی!!!

 

سانکی چوبان یاییب قوزونی داغدا نی چالیر !

رؤیا دوغـــور قوزی قولاغیندا چوبـــان سسی !!!

جسمیم قوجالسادا هله عشقیم قوجالمیوب

جینگیلده ییـر هله قولاغیمدا جـــوان سسی !

 

سانکی زمان گوله شدی منی گوپسدی یئره

شعریم یازیم اولوب ییخیلان پهلـــوان سسی !!!

 

آخیر زماندی بیر قولاق آس عرشی تیتره دیـر

ملت لرین هــارای ، مددی ، الامـــان سسی !!!

 

انسان خـزانی دیر تؤکولور جـان خزه ل کیمی

سازتک خزه ل یاغاندا سیزیلدار خزان سسی !!!

 

قیرخ ایلدی دوستاغام قالا بیلمز او یاغلی سس

یاغ سیز سادا قبـول ائله مندن یــاوان سسی !

 

من ده سسیم اوجالسا گرک دیر ،یامان دئییم

ملت آجیخلی دی اوجـــالیبدی یامـان سسی !!!

 

دولدور نواره قوی قالا ، بیــر گون ، بـو کؤرپه لر

آلقیشلاسینلا ذوق ایله بیزده ن قالان سسی !

 

مقناطیس اولسـا سسده چکر ، انقلابــــدا باخ !

آزادلیـق آلــدی سرداریمیــن قهرمــان سسی !

 

انسان قوجالمیش اولسا ،قولاخلار آغیرلاشار

سانکی یازیق قولاخدا ،گورولدور زمان سسی !

 

با خ بیر درین سکوته سحر ، هانسی بیر نــوار

ضبــط ایلیـه بیلـــر بئله بیــر جــــاودان سسی ؟

 

سانجیــر منی بو فیشقا چالانلاردا ” شهریـــار ” !!!

من نیله ییم کی فیشقـایا بنزه ر ایلان سسی


1390/06/10

yalan dünya

   یازان: araz azeri turk    بولوم :شهریارşəhryar ،

yalan dünya

sənin bəhrən yeyən kimdir ?

kiminkisən ?  yiyə­n kimdir ?

sənə doğru deyən kimdir ?

yalan dünya ,  yalan dünya !

 

səni fərzanələr atdı

qapıb ,  divanələr tütdi

kimi aldı ,  kimi satdı

satan dünya ,  alan dünya

 

atı əzl dağa saldıq

yurulduqca dalı qaldıq

atı satdıq ,  olağ aldıq

yəhər oldi palan dünya

 

biri ayna  ,  biri pasdır

biri aydın ,  biri kas dır

gəcə toydur ,  günüz yasdır

gül açdıqca ,  solan dünya

 

ıgıt ərın başın yeyə­n

qocalar bozbaşın yeyə­n

qəbirlərin daşın yeyə­n

özü yenə qalan dünya !

 

nə qandın ,  kim gül əkndir ?

kim qılıc tək qan tökəndir ?

temir hələ kürə kən dir

çəngiz canın ,  alan dünya

 

yaman qürqü!yığılaydın!

tufanlarda boğulaydın !

nolaydı bir dağılaydın

bizi dərdə salan dənıa

çatlb səndən köçən keçdi

əcl camın ,  ıçən keçdi

olan oldu ,  keçn keçdi

nə istərdin olan dünya

 

buğulaydın ,  doğan yerdə

doğub xəlqi boğan yerdə

oğul nəşin oğan yerdə

ana zülfün yolan dünya

 

şəhrıar

 

 

یالان دونیا

سنین بهرن یئین کیمدیر؟

کیمینکی سن؟ ییه­ن کیمدیر؟

سنه دوغرو دئین کیمدیر؟

یالان دونیا، یالان دونیا!

 

سنی فرزانه لر آتدی

قاپیب، دیوانه لر توتدی

کیمی آلدی، کیمی ساتدی

ساتان دونیا، آلان دونیا

 

آتی ازل داغا سالدیق

یورولدوقجا دالی قالدیق

آتی ساتدیق، اولاغ آلدیق

یهر اولدی پالان دونیا

 

بیری آینا ، بیری پاس دیر

بیری آیدین، بیری کاس دیر

گجه توی دور، گونوز یاس دیر

گول آچدیقجا، سولان دونیا

 

ایگیت ارین باشین یئیه­ن

گوجالار بوزباشین یئیه­ن

قبیرلرین داشین یئیه­ن

اءوزو یئنه قالان دونیا!

 

نه قاندین، کیم گول اکن دیر؟

کیم قیلیج تک قان توکن دیر؟

تیمور هله کوره کن دیر

چنگیز جانین، آلان دونیا

 

یامان قورقو! ییغیلایدین!

طوفانلاردا بوغولایدین!

نه اولایدی بیر داغیلایدین

بیزی درده سالان دنیا

 

چاتیب، سندن کوءچن کچدی

اجل جامین، ایچن کچدی

اولان اولدو، کئچن کئچدی

نه ایستردین اولان دونیا

 

بوغولایدین، دوغان یئرده

دوغوب خلقی بوغان یئرده

اوغول نعشین اوغان یئرده

آنا زولفون یولان دونیا

 

شهریار


1390/06/10

VARLIQ

   یازان: araz azeri turk    بولوم :شهریارşəhryar ،

azadlıq qüşi VARLIQ

hər çənd qutlmaq hələ yox darlığmızdan

əma bir azadlıq doğulub var lığmızdan

( VARLIQ ) nə bizim təkcə azadlıq qüşümüz dir

bir müjdədə vermiş bizə həmkarlığmızdan

bəhbəh nə şirin dilli , bu cənnət qüşi  , tuti

qəndin alıb ilham  ilə dınar  liğmizidan

dil açamda karlıq da gedr , kurluğlumuzda

çün lallığmiz doğmuşıdı karlığmızdan

düşmən bizi əlbir gürə , təslim oly naçar

təslim oluruq düşmınə naçarlığmızdan

hər inqilabın vür -  yıxı sün bənnalıq istər

dəstur gərək almaq daha memarlığmızdan

huşyar olasuz , düşməni məğlüb edəcəksiz

düşmənlərimiz qürxüri huşyarlığmızdan

birlik yaradun , süz bir olar bız kişilərdə

yüxlüqlarımız bitdirəcək var lığmızdan

ata şəhrıar

آزادلیق قوشی وارلیق

هر چند قوتلماق هله یوخ دارلیغمیزدان

اما بیر آزادلیق دوغولوب وار لیغمیزدان

(وارلیق)نه بیزیم تکجه آزادلیق قوشوموز دیر

بیر مژده ده وئر میش بیزه همکار لیغمیزدان

به به نه شیرین دیللی،بو جنت قوشی ،طوطی

قندین آلیب الهام  له دینارلیغمیزدان

دیل آچامدا کارلیق دا گئدر،کورلوغلوموزدا

چون لا للیغمیز دو غموش ایدی کار لیغمیزدان

دشمن بیزی ال بیر گوره،تسلیم اولی ناچار

تسلیم اولوروق دشمنه   ناچار  لیغمیزدان

هر انقلابین وور- ییخی صون بنالیق ایسته ر

دستور گرگ آلماق داها معمار  لیغمیزدان

هشیار اولاسوز،دشمنی مغلوب ائده جکسیز

دشمنلریمیز قور خوری هشیار  لیغمیزدان

بیرلیک یارادون،سوز بیر اولاربیز کیشی لرده

یوخلو قلار یمیز بیتد یره جک وار لیغمیزدان

 

آتا شهریار

 


1390/06/10

Səhəndiyyə1

   یازان: araz azeri turk    بولوم :شهریارşəhryar ،

Səhəndiyyə

Şah dağım, çal papağım, el dayağım, şanlı Səhəndim,

Başı Dumanlı Səhənd’im, başı Tufanlı Səhənd’im

Başda Heydər Baba tək qarla, qırovla qarışıpsan

Son ipək telli buludlarla ufugda sarışıpsan

Savaşırkən barışıpsan

Göydən ilham alalı sırrı səmâvatə deyərsən

Hələ ağ kürkü bürün, yazda yaşıl don da geyərsən

qoradan halva yeyərsən

Döşlərində sonalar sinəsi tək şux məmələrdə

Nə şirin çişmələrin var

O yaşlı telləri yel hörmədə, aynalı Səhərdə

İşvəli eşmələrin var

qoy Yağış yağsa da yağsın, sel olub axsa da axsın,

Yanlarında derələr var

Qoy gələmgaşların uçsun fərələrlə, hamı baxsın

Başlarında herələr var, sıldırımlar, sərələr var

O ətəklərdə nə qızlar yanağı lalələrin var

quzular otlayarax neydə nə xoş lalələrin var

Ay kimi hâlələrin var

Gül çiçəktdən bezənəndə, ne gəlinler kimi nâzın,

Suların zemzemesinde, ne dərin râz-ı niyâzın

Oynayar güllü gotazın

Titreyir saz telli tek şaxələrin   çayda, çəməndə,

Yel o tellərdə gəzəndə, ne Köroğlu çalı sazın

Ördəyin xəlvət edib göldə pərilərlə çiməndə

Qol qanaddan ona ağ hövlə açar qəzməli qağzın

qış gedir, qoy gələ yazın.

Hələ novruzgülü var, qar çiçəyin var, gələcəklər

Yel yağışda yuyunub  günşlpiləndə güləcəklər

Üzlərin tez siləcəklər

Qışda keklik həvəsiylə çölə qaçdığda canavarlar

Qarda qaqqıldayarag nazlı qələmqaşların olsun

Yaz o döşlərdə nahar məndəsin açdıgda çobanlar

Bollu, südlü sürülər, daldı qavutmaşların olsun

Ad alıp səndən o şair ki, sən ondan ad alarsan

Ona hər dad verəsən yüz o muqabil dad alarsan

Tarıdan hər zad alarsan

 

Adaş oldugda sən onla daha artıx ucalarsan

O cəlalətlə DƏMAVƏND dağından bac alarsan

Şir əlindən tac alarsan

 

O da şe’rin, ədəbin şah dağıdır, şanlı Səhəndi,m

O da sən tək atıb ulduzlara şe’riyle kəməndi

O da Simorğdan almağdadı fəndi

Şe’r yazanda qələmindən görusən dür səpələndi

Sanki ulduzlar ələndi

Söz deyəndə görusən qatdı gülü, püstəni, qəndi

Yaşasın şair efendi

 

O nə şair ki dağın vəsfinə misdaq oni gördum

Mən sənin tək ucaliğ məşqinə muşşaq oni gurdum

Eşqə eşq əhlinə muştaq oni gurdum

 

O nə şair ki, xıyal mərkəbinə şuv şığıyanda

O nəhəng at ayağın tozlu bulutlarda qoyanda

Lulələnməkdədi yer göy nəcə tumar sarayanda

Görəcəksən o zamanda

Nə zaman varsa məkan varsa kəsib biçdi bir anda

Geçəcəklər gələcəklər nə bu yanda nə o yanda

Nə bilim galdi hayanda

Bax nə hörmət var onun öz demişi tuk papağında

Serini tacı əyilmiş başı durmuş qabağında

Başına savrulan inci çarığ olmuş ayağında

Vəhyidir şeri mələklərdi pıçıldır qulağında

Şəhdi var bal dodağında

 

Oda dağlar kimi şənində nə yazsam yaraşandı

Oda zalim qoparan qarla kuləklə duruşandı

Quduza zalimə qarşı sinəgərmiş vuruşandı

Amma vəchində fağır xalqı eyilmiş soruşandı

Qara millətdə hunər bulsa hunərlə araşandi

Qaralarla qarışandı

Sarışandı

 

Gecə haqqın gözudur, tur törətmiş ocağında

əriyib yağ tək urəklərdi yanırar çırağında

mey məhəbbədən içibdir lalə bitibdir yanağında

o bir oğlan ki , pərilər su içəllər çanağında

inci qaynar bulağında

təbI bir sevgili bulbulki , oxur gul budağında

sarı sunbul qucğında

sular əfsanədi söylər onun əfsunli bağında

səhərin çənli çağında

 

Şairin zövqi ,nə əfsunli ,nə əfsanəli bağlar

Ay nə bağlar ki əlif leylidə əfsanədə bağlar

Od yaxıb dağları dağlar

Gul gulərsə bulağ ağlar

Şairn aləmi ölməz ona aləmda zaval yox

Arzılar orda nə xatirliyə imkandı ,mahal yox

Bağ-i cənnət kimi orda ,bu haramdir bu halal yox

O məhəbbətdə məlal yox

Orda haldır daha qal yox

 

Gecələr orda gumuşdəndi ,qızıldan ,nə gunuzlər

Nə zümürrüd kimi baglardı ,nə mərmər kimi düzlər

Nə sarı telli inəklər ,nə ala gözli ökuzlər

Ay necə ay kimi üzlər

Gul ağaclari nə tavus kimi çətrin açıbalvan

Hillə kərvanıdı çöllər bəzənər sursə bu karvan

Dəvə kərvanıdı dağlar ,yuki ətləsdı bu heyvan

Sabirin şəhrinə doğru ,qatarı çəkmədə sərvan

O xıyalımdakı şirvan

 

Orda qarda yağar amma daha gullər sola bulməz

Bu təbiət o təravətdə mahaldır ola bulməz

Ömr peymanəsi orda dola bulməz

 

O üfüqlərdə baxarsan  nə dənizlər ,nə boğazlar

Nə prilər kimi quşlar qonub uçmaxda ,nə qazlar

Gölda çimməkdə nə qizlar

Balığ ulduz kimi göllərdə  dənizlərdə parıldar

Abşar  mirvarısın sel kimi tökdükdə xarıldar

Yel kuşuldar su şarıldar

Qəsrilər vardı qızıldan,qalalar vardı əqiqdən

,,RAFAYIL,, tablosu tək səhnələri əhd-i əqiqdən

Doymasan köhnə rəfiqdən

Cənnətin bağları tək bağlarının hur o qusuri

Düzülüb qurfədə eyvanda ,cəvahir kimi huri

əldə hurilərinin cam-e buluri

tüngünün gel kimi səhbay-e təhuri

nə maraxlar ki ayıx gözlərə röyadı diyərsən

nə şafağlar ki dərin baxmada dəryadi diyərsən

uyduran cənnət-e məvadı diyərsən

zöhrənin qəsri birilyan ,hasarı incidi yaqut

qəsr-i cadudi məhəndisləri HARUT ilə MARUUT

orda mani dayanib qalmiş o surətlərə məbhut

gapi qulluxcusu HARUUT

Oda şerin muziyin mənbəi sərçişmədi qaynar

Nə pərilər kimi fəvvarədə əfşan olub oynar

Şair ancağ onu anlar

Doli məhtab kimi istəxridi fəvvarələriylə

Mələkə orda çimir ay kimi məhparələriylə

Güllü güşvarələriylə

Şer o musiqi şabaş olmada əfşandı pərişan

Sanki ağ şahidir olmaxda gəlin başına əfşan

Nə gəlinlər ki nə ənlik üzə sürtüllə , nə kirşan

Yaxa nə tülki nə dovşan


1390/06/10

Səhəndiyyə2

   یازان: araz azeri turk    بولوم :شهریارşəhryar ،

Ağ pərilər sarı köynəkli buludlardan ənirlər

Süd gölündə mələkə iylə çimirkən sevinirlər

sevinirlər öyünürlər

qovzananda hərə əldə dolu bir cam aparırlar

sanki çəngilərə şairlərə ilham aparırlar

dərya qızlarına peyğam aparırlar

dənizin örtüyü mavi ofoqun səqfi səmavi

aynadı hər nə baxırsan yer olub göylə musavi

ğəq  onun şerinə ravi

ğurfələr ay-bulud altında olar tək görünürkən

göz açıb yummada çırağlar kimi yandığda sönurlər

səhnələr çərxi ələk tək burunub gahda çönürlər

kölgəliklərsürünürlər

 

zöhrə eyvanda ilahə şinelində görünərkən

baxasan hafizidə orda cəlalətlə görərsən

nə sevərsən

 

gah görən hafize şirazilə eyvanda durublar

gah görən ortada şətrənci qurarkən oturublar

gah görənsazilə avazilə əyləncə qurublar

sanki sağərdə vurublar

 

xacə əlhan oxuyanda hamı işdən dayanırlar

o nəvalərlə pərilər gah uyub gah oyanırlar

lalələr şövləsi əlvan şeşə rəngi boyanırlar

nə xumar gözlə yanırlar

 

qanad istər bu fəza , qoy qala tərlanlı səhəndim

eşit öz qissəmi dəstanımı dəstanlı səhəndim

səni heydərbaba o nə,rələriylə çağıranda

o səfil darda qalan , tülkü qovan şer bağıranda

şeytanın şıllağa qalxan qatırı noxda qıranda

dədəqorqud səsin aldım dedim arxamdi inandım

arxa durduxca səhəndim savalan tək havalandım

selə qarşı qovalandım

COŞQUNun da qanı daşdı mənə bir haylı sıs oldi

Hər səsiz bir nəfəs oldi

Bakı dağlarıda hay Verdi səsə qeyha ucaldı

Otayın nə,rələri sanki bu taydanda bac aldi

Qurd acaldıqca qocaldı

RAHİMin nə,rəsi qovzandı deyən toplar açıldı

Sel gəlib nəhrə qatıldı

RUSTƏMin topları səsləndi deyən bomlar açıldı

Bizə gül qonça saçıldı

Qorxma gəldim,, deyə səslərdə mənə can dedi qardaş

Mənə cancan deyərək düşmana qanqan dedi qardaş

Mənə sultan dedi qardaş

Məndə ,,canım,, çığırıb,,can sənə qurban,, dedi qardaş

El sizə qaflan dedi qardaş

Dağ sizə asan dedi qardaş

 

dağlı heydər babanın arxası hər yerdə dağ oldi

Dağa dağlar dayağ oldi

Arazım ayna çırağ goymada aydın şafağ oldi

O tayın nəğməsi qovzandi ürəklər qulağ oldi

Yenə qardaş deyərək qaçmada başlar ayağ oldi

Qaçdığ üzləşdik arazda ,yenə gözlər bulağ oldi

Yenə qəmlər qalağ oldi

Yenə qardaş sayaği sözlərimiz bir sayağ oldi

Vəsl iyin almada əl çatmadi eşqim damağ oldi

Həlalik qəm saralarkən qaralar döndi ağ oldi

Arazın süd gölu daşdi qayalıxlarda bağ oldi

Sarı sunbullərə zulf içrə oraxlar darağ oldi

Yoncalıxlar yenə bıldırçına yay yaz yatağ oldi

Gözdə yaşlar çırağ oldi

Lalə bitdi yanağ oldi

Qonça güldi dodağ oldi

Nə sol oldi nə sağ oldi

Elimi arxamı gördukdə  zalm ovçu qısıldı

Selmkimi zülmi basıldı

Zinə arx oldi kəsildi

Gül gözundən yaşı sildi

Tor quran ovçu atın qovmada sindi geri qaldı

Özü getdi toru qaldı

Amma  heydər babada bildi ki biz tək hamı dağlar

Bağlanıb qolqola zəncirdə buludlar odur ağlar

Nə bilim bəlkə təbi,ət özü namərdə gun ağlar

əyri yolları açarkən dez olan qolları bağlar

saf olan sinəni dağlar

dağlarin hər nə qoçi tərlanı ceyraanı marali

hamı düşgün hamı pozğun sinələr dağlı yaralı

gün açan yerdə saralı

amma zənnetmə ki dağlar yenə qalxan olacağdır

məhşər olmaxdadı bunlar daha vulqa olacağdır

zulm dünyası yanar kən də tilit qan olacağdır

vay......... nə tufan olacağdır

dedin azər elinin bir yaralı nisgilitəm  mən

nisgil olsamda gülüm bir əbədi sevgiliyəm mən

yad məni atsada öz gulşənimin bülbülüyəm mən

elimin farsıcada dərdini söylər diliyəm mən

haqqa doğru nə qaranlığsa , el məşəliyam mən

əbədiyyət gülüyəm mən

nisgil ol çərçiyə qalsın ki cəvahir nədi qanmır

mədəniyyə dəbin eylir bədəviyyət bir üsanmır

gün gedir az qala batsın gecəsindən bir usanmır

bir öz əhvalına yanmır

atar insanlığı amma yalan ənsabı atanmaz

fitnə qovzanmasa gün gecə aasudə yatanmaz

başı başlarə qatanmaz

 

Amma məndə sarı sən arxayın ol şanlı səhəndim

Dəli ceyranlı səhəndim

Mən daha ərşi əla kölgəsi tək başda tacım var

Hərəcim yox fərəcim var

Mən əli oğltam , azadələrin mərdi muradi

O qaranlığlara məşəl o ışığlığlara hadi

Həqqə imanə munadi

Başda sənmaz sipərim əldə kütəlməz qələcım var

Son  ata şəhriyar


1390/06/10

Türkün Dili

   یازان: araz azeri turk    بولوم :شهریارşəhryar ،

 

Türkün Dili

Türkün dili tək sevgili istəkli dil olmaz

Özgə dile qatsan, bu əsil dil əsil olmaz.

Öz şe'rini Farsa, Ərəbə qatmasa şair,
Şe'ri eşidənlər, oxuyanlar kəsil olmaz.

Pşmiş kimi şe'rin də gərək dadı-duzu olsun,
Kənd əhli bilərlər ki, doşabsız xəşil olmaz

Sözlər də cəvahir kimidir, əsli bədəldən
Təşhis verən olsa bu qəd"r zir-zibil olmaz

Şair ola bilməzs"n, anan doğmasa şair,
Missən a balam, hər sarı köynək qızıl olmaz.

Ötməz, oxumaz bülbülü salsan qəfəs içrə,
Dağ-daşda doğulmuş dəli ceyran həmil olmaz.

İnsan odur, dutsun bu zəlil xalqın əlindən,
Allahı sevərsən, belə insan zəlil olmaz

Hər çənd Sərabın südü cox, yağ-balı çoxdur,
Baş ərsə də çatdırsa Sərab Ərdəbil olmaz.

Millət qəmi olsa bu çocuklar çöpə dönməz,
Ərbablarımızdan da qarınlar təbil olmaz.

Məndən də nə zalım oğlum, nə qisasçı,
Bir dəfə bunu qan ki, ipəkdən qəzil olmaz.    

Düz vaxtda dolar taxta-tabaq edviyə ilə,
Onda ki, nənəm sancılanar, zəncəfil olmaz.         

Fars şairi cox sözləri bizdən aparmış,
Sabir kimi bir süfrəli şair paxıl olmaz.

Türkün məsəli, folkloru dünyada təkdir,
Xan yorğanı, kənd içrə məsəldir, mitil olmaz. 

Azər qoşunu qeysəri-Rumu əsir etmiş,
Kəsra sözüdür, bir belə tarix nağıl olmaz.

Bu Şəhriyarın təb'i kimi çimməli çeşmə,
Kövsər ola bilsə demirəm, Səlsəbil olmaz.

 

ATA ŞƏHRYAR

تورکون دیلی

تورکون دیلی تک سئوگلی ایستکلی دیل اولماز
ئوزگه دیله قاتسان , بو اصیل دیل, اصیل اولماز

ئوز شعرینی فارسا- عربه قاتماسا شاعر

شعری اوخویانلار. ائشیدنلر کسیل اولماز

پیشمیش کیمی, شعرین ده گرگ داددوزی اولسون
کند اهلی بیلرلر کی دوشابسیز خشیل اولماز

سوزلرده جواهر کیمی دیر,اصلی بدلدن
تشخیص وئرن اولسا بو قده ر زیر- زیبیل اولماز

شاعیر اولا بیلمزسن, آنان دوغماسا شاعیر
مس سن, آبالام هر سارای کوینک قیزیل اولماز

 

آزاد قوی اوغول عشقی طبیعتده بولونسون

داغ , داشدا دوغولموش ده لی جیران حمیل اولماز

چوخ قیسا بوی اولسان اولوسان جین کیمی شیطان

 

چوخ دا اوزون اولما که اوزوندا عقیل اولماز

 


اوتمز اوخوماز بولبولو سالسان قفس ایچره
داغ , داشدا دوغولموش ده لی جیران حمیل اولماز

اینسان اودی توتسون بو ذلیل خلقین الیندن
آلاهی سورسن , بئله اینسان ذلیل اولماز

چوق داکی سرابون سویی واریاغ- بالی واردیر
باش عرشه ده چاتدیرسا , سراب اردبیل اولماز


میلت غمی اولسا , بو جوجوقلار چوپه دونمز
اربابلار یمیزدان قارینلار طبیل اولماز

مندن ده نه ظالم چیخار,اوغلوم, نه قصاص چی
بیر دفعه بونی قان کی ایپکدن قیزیل اولماز

دوز واختا دولار تاختا, طاباق ادویه ایله
اوندا کی ننه م سانجیلانارزنجفیل اولماز

فارس شاعری چوخ سوزلرینی بیزدن آپارمیش
"صابر" کیمی بیر سفره لی شاعیر, پخیل اولماز

تورکون مثلی فولکلوری دنیادا تک دیر
خان یورقانی, کند ایچره مثل دیر, میتیل اولماز

آذر قوشونی, قیصر رومی اسیر ائتمیش
کسری سوزودیر بیر بئله تاریخ ناغیل اولماز

بو «شهریار»ین طبعی کیمی چیممه لی چشمه

کوثر اولا بیلسه دئمیرم , سلسبیل اولماز

آتا شهریار

 

 


1390/06/10

tarım mənim

   یازان: araz azeri turk    بولوم :شهریارşəhryar ،

tarım mənim

sızlayır əhvalıma sübhə qədər tarım mənim

təkcə tarımdir qara günlərdə qəmxarım mənim

çox vəfalı dostlarım vardır ,  yaman gün gəlcəyin

tardan özgə qalmayır yar-i vəfadarım mənim

yer tütüb qəmxanədə ,  qildim fəramuş aləmi

mən tarın qəmxuarı oldum ,  tar qəmxuarım mənim

güzlərimə hər təbəssüm sancılır neştr kimi

kiprigi xəncrdi , ah ,  ol bi vəfa yarım mənim

asman aldı kənarımdan ay ozlu yarımı

yaş tükr olduz kimi bu çəşmi xunbarım mənim

ey bu qəmli künlümün tab o təvanı ,  söylə bir

əhd o peymanın nə oldu ,  nüldü ılğarım mənim

" şəhryar "ım gərçi mən süz mülkünün sultanıyəm

göz yaşımdan başqa yoxdur dürr şəhvarım mənim

ata şəhrıar

 

تاریم منیم

سیزلاییر احوالیما صبحه قدر تاریم منیم
تكجه تاریم دیر قارا گونلرده غمخواریم منیم

چوخ وفالی دوستلاریم واردیر، یامان گون گلجه یین
تاردان اوزگه قالماییر یار وفاداریم منیم

یئر توتوب غمخانه ده، قیلدیم فراموش عالمی
من تارین غمخواری اولدوم، تار غمخواریم منیم

گوزلریمه هر تبسم سانجیلیر نئشتر كیمی
كیپریگی خنجردی، آه، اول بی وفا یاریم منیم

آسمان آلدی كناریمدان آی اوزلو یاریمی
یاش توكر اولدوز كیمی بو چشم خونباریم منیم

ای بو غملی كونلومون تاب و توانی، سویله بیر
عهد و پیمانین نه اولدو، نولدو ایلغاریم منیم

"شهریار"م گرچی من سوز مولكونون سلطانی یم
گوز یاشیمدان باشقا یوخدور در شهواریم منیم

آتا شهریار

 


1390/06/10

Yar qasidi

   یازان: araz azeri turk    بولوم :شهریارşəhryar ،

Yar qasidi

Sən yarımın qasidisən

əyləş sənə çay demişəm

 

xətalini  göndəribdir

bəs ki mən axvay demişəm

 

ax gecələr yatmamışam

mən sənə laylay demişəm

 

sən yatalı mən gözumə

ulduzları say demişəm

 

hər kəs sənə ulduz deyə

özüm sənə ay demışəm

 

səndən sora həyatə mən

şirindisə zay demişəm

 

hər gözəldən bir pay alıb

sən gözələ pay demişəm

 

sənin gün tək batmağıvı

aybatana tay demişəm

 

indi yaya qış deyirəm

sabiq qışa yay demişəm

 

gah toyunu yadə salıb

mən dəli nay nay demişəm

 

sonra yenə yasə batıb

ağları hayhay demişəm

 

ətək dolu dərya kimi

göz yaşəma çay demişəm

 

ömrə surən mən qara gün

ax demişəm vay demişəm

şəhryar

 

یار قاصدی

سن یاریمین قاصیدی ســـن

ایلش سنه چای دئمـــــــیشم

 

خیالینـــــــی گؤندریـــــب دی

بس کی من آخ وای دئمیشم

 

آخ گئجه لر یاتمامیشــــــام

من سنه لای ـ لای دئمیشم

 

سن یاتالی من گؤزومــــه

اولدوزلاری سای دئمیشـم

 

هرکس سنه اولدوز دئیـــه

اؤزوم سنه آی دئــــــمیشم

 

سندن سونرا حیــــــاته من

شیرین دیسه زای دئمیشـم

 

هر گؤزلدن بیر گول آلیــب

سن گؤزله پای دئمیشــــــم

 

سنین گون تک باتمــاغینی

آی باتانا تـــــای دئمــــــیشم

 

ایندی یایـــا قـــیش دئییــــرم

سابیق قیشــا یای دئمــــیشم

 

گاه تویونو یـــــاده ســـــالیب

من دلی نــای ـ نــای دئمیشم

 

سونـرا یئنه یاســــــــه باتیب

آغلاری های ـ های دئمـیشم

 

اتک دولـــــو دریــــا کیمــــی

گؤز یاشیما ، چای دئمـــیشم

 

عؤمره سورن من قارا گون

آخ دئمیشم ، وای دئمیشم ...

( شهریار )

 


1390/06/10

سهندیه

   یازان: araz azeri turk    بولوم :شهریارşəhryar ،

سهندیه

شاه داغیم، چال پاپاغیم، ائل دایاغیم، شانلی سهند´یم
باشی توفانلی سهند´یم
باشدا حئیدر بابا تک قارلا، قیروولا قاریشیبسان
سون ایپک تئللی بولودلارلا اوفوقده ساریشیبسان
ساواشارکن باریشیبسان

گؤیدن ایلهام آلالی سیرری سماواتا دییه رسه ن
هله آغ کورکو بورون، یازدا یاشیل دون دا گییه رسه ن
قورادان حالوا یییه رسه ن

دؤشلرینده سونالار سینه سی تک شوخ ممه لرده
نه شیرین چئشمه لرین وار
او یاشیل تئللری، یئل هؤرمه ده آینالی سحه رده
عیشوه لی ائشمه لرین وار
قوی یاغیش یاغسا دا یاغسین
سئل اولوب آخسا دا آخسین
یانلاریندا دره لر وار
قوی قلم قاشلارین اوچسون فره لرله، هامی باخسین
باشلاریندا هئره لر وار
سیلدیریملار، سره لر وار

او اتکلرده نه قیزلار یاناغی لاله لرین وار
قوزولار اوتلایاراق نئیده نه خوش ناله لرین وار
آی کیمی هاله لرین وار

گول- چیچکدن بزه نه نده، نه گلینلر کیمی نازین
یئل اسه نده او سولاردا نه درین راز-و نیازین
اوینایار گوللو قوتازین
تیتره یه ر ساز تئلی تک شاخه لرین چایدا چمنده
یئل او تئللرده گزه نده، نه کوراوغلو چالی سازین
اؤرده یین خلوت ائدیب گؤلده پریلرله چیمه نده
قول-قاناددان اونا آغ هووله آچار غمزه لی قازین
قیش گئدیر، قوی گله یازین
هله نووروز گولو وار، قار چیچه یین وار، گله جکلر

یئل یاغیشدا یووونوب گون سه پیله نده  گوله جه کلر
اوزلرین تئز سیله جکلر

قیشدا کهلیک هوسیله، چؤله قاچدیقدا جاوانلار
قاردا قاققیلدایاراق نازلی قلمقاشلارین اولسون
یاز، او دؤشلرده ناهار منده سین آچدیقدا چوبانلار
بوللو سودلو سورولر، دادلی قاووتماشلارین اولسون

آد آلیر سندن او شاعیر کی سن اوندان آد آلارسان
اونا هر داد وئره سه ن، یوز او موقابیل داد آلارسان
تاریدان هر زاد آلارسان
آداق اولدوقدا، سن اونلا داها آرتیق اوجالارسان
باش اوجالدیقدا دماوند داغیندان باج آلارسان
شئر الیندن تاج آلارسان

او دا شئعرین، ادبین شاه داغیدیر، شانلی سهند´یم
او دا سن تک آتار اولدوزلارا شئعریله کمندی
او دا سیمورغدان آلماقدادی فندی
شئعر یازاندا قلمیندن باخاسان دورر سپه له ندی
سانکی اولدوزلار اله ندی
سؤز دییه نده گؤره سه ن قاتدی گولو، پوسته نی، قندی
یاشاسین شاعیر افندی

او نه شاعیر، کی داغین وصفینه میصداق اونو گؤردوم
من سنین تک اوجالیق مشقینه مششاق اونو گؤردوم
عئشقه، عئشق اهلینه موشتاق اونو گؤردوم
او نه شاعیر، کی خیال مرکبینه شووشیغایاندا
او نهنگ آت، آیاغین توزلو بولودلاردا قویاندا
لوله له نمکده دی یئر-گؤی، نئجه تومار سارییاندا
گؤره جکسه ن او زاماندا
نه زامان وارسا، مکان وارسا کسیب بیچدی بیر آندا
گئچه جکلر، گله جکلر نه بویاندا، نه او یاندا
نه بلیلم قالدی هایاندا؟

باخ نه حٶرمت وار اونون اؤز دئمیشی توک پاپاغیندا
شهرییار´ین تاجی اه ییلمیش باشی دورموش قاباغیندا
باشینا ساوریلان اینجی، چاریق اولموش آیاغیندا
وحیدیر شئعری، ملکلردی پیچیلدار قولاغیندا
آیه لردیر دوداغیندا
شهدی وار بال دوداغیندا

او دا داغلار کیمی شانینده نه یازسام یاراشاندیر
او دا ظالیم قوپاران قارلا، کولکله دوروشاندیر
قودوزا، ظالیمه قارشی سینه گرمیش، ووروشاندیر
قودوزون کورکونه، ظالیم بیره لر تک داراشاندیر
آمما واختیندا فقیر خالقی اییلمیش سوروشاندیر
قارا میللتده هونر بولسا، هونرله آراشاندیر
قارالارلا قاریشاندیر
ساریشاندیر
گئجه حاققین گؤزودور، طور تؤره تمیش اوجاغیندا
اریییب باغ تک اوره کلردی یانارلار چیراغیندا
مئی، محببتدن ایچیب لاله بیتیبدیر یاناغیندا
او بیر اوغلان کی، پریلر سو ایچه رلر چاناغیندا
اینجی قاینار بولاغیندا
طبعی بیر سئوگیلی بولبول کی، اوخور گول بوداغیندا
ساری سونبول قوجاغیندا
سولار افسانه دی سؤیله ر اونون افسونلو باغیندا
سحه رین چنلی چاغیندا

شاعیرین ذٶوقو، نه افسونلو، نه افسانه لی باغلار
آی نه باغلار کی "الیف لئیلی" ده افسانه ده باغلار
اود یاخیب، داغلاری داغلار
گول گوله رسه بولاق آغلار

شاعیرین عالمی اؤلمه ز، اونا عالمده زاوال یوخ
آرزولار اوردا نه، نه خاطیرله یه ایمکاندی، ماحال یوخ
باغ-ی جننت کیمی اوردا "او حارامدیر، بو حالال" یوخ
او محببتده ملال یوخ
اوردا حالدیر، داها قال یوخ
گئجه لر اوردا گوموشدندی، قیزیلدان نه گونوزلر
نه زوموررود کیمی داغلاردی، نه مرمر کیمی دوزلر
نه ساری تئللی اینه کلر، نه آلا گؤزلو اؤکوزلر
آی نئجه آی کیمی اوزلر

گول آغاجلاری نه طاووس کیمی چترین آچیب الوان
حولله کروانیدی، چؤللر، بزه نه ر سورسه بو کروان
دوه کروانی دا داغلار، یوکو اطلسدی بو حئیوان
صابیر´ین شهرینه دوغرو، قاتاری چکمه ده سروان
او خیالیمداکی شیروان

اوردا قار دا یاغار، آمما داها گوللر سولابیلمه ز
بو طبیعت، او طراوتده ماحالدیر، اولابیلمه ز
عؤمر پئیمانه سی اوردا دولابیلمه ز

او اوفوقلرده باخارسان نه دنیزلر، نه بوغازلار
نه پری لر کیمی قولار، قونوب-اوچماقدا نه قازلار
گؤلده چیممه کده نه قیزلار

بالیق اولدوز کیمی گؤللرده، دنیزلرده پاریلدار
آبشار مورواریسین سئل کیمی تؤکدوکده خاریلدار
یئل کوشولدار، سو شاریلدار

قصریلر واردی قیزیلدان، قالالار واردی عقیقدن
رافائل تابلوسو تک، صحنه لری عهد-ی عتیقدن
دویماسان کؤهنه رفیقدن
جننتین باغلاری تک باغلارینین حورو قوصورو
الده حوریلرینین جام-ی بولورو
تونگونون گول کیمی صهبا-یی طهورو

نه ماراقلار کی، آییق گؤزلره رؤیادی دئییرسه ن
نه شافاقلار کی، دیرن باخمادا دریادی دئییرسه ن
اویدوران جننت-ی مأوادی دئییرسه ن
زٶهره نین قصری بیریلیان، حیصار نرده سی یاقوت
قصر-ی جادودو، موهندیسلری هاروت ایله ماروت
اوردا مانی دایانیب قالمیش او صورتلره مبهوت
قاپی قوللوقچوسو هاروت
اوردا شئعرین، موزیکین منبعی سرچئشمه دی قاینار
نه پریلر کیمی فه وواره دن افشان اولوب اوینار
شاعیر آنجاق اونو آنلار

دولو مهتاب کیمی ایستخریدی فه وواره لر ایله
ملکه اوردا چیمیر، آی کیمی مهپاره لر ایله
گوللو گوشواره لر ایله
شئعر-و موسیقی شاباش اولمادا، افشاندی پریشان
سانکی آغ شاهیدیر اولماقدا گلین باشینا افشان
نه گلینلر کی، نه انلیک اوزه سورته رلر، نه کیرشان
یاخا نه تولکو نه دووشان

آغ پریلر، ساری کؤینه کلی بولودلاردان ائنیرلر
سود گؤلونده ملکه ایله چیمه رکن سئوینیرلر
سئوینیرلر، اؤیونورلر
قووزاناندا هله الده دولو بیر جام آپاریرلار
سانکی چنگیلره، شاعیرلره ایلهام آپاریرلار
دریا قیزلارینا پئیغام آپاریرلار

دنیزین اؤرتویو ماوی، اوفوقون سقفی سماوی
آینادیر هر نه باخیرسان: یئر اولوب گؤیله موساوی
غرق اونون شئعرینه راوی
غورفه لر، آی، بولود آلتیندا اولار تک گؤرونورلر
گؤز آچیب-یومما، چیراقلار کیمی یاندیقدا سؤنورلر
صحنه لر چرخ-ی فلک تک بورونوب، گاه دا چؤنورلر
کؤلگه لیکلر سورونورلر

زوهره ائیواندا ایلاهه شینئلینده گؤرونه رکن
باخسان حافیظ´ی ده اوردا صلابتله گؤره رسه ن
نه سئوه رسه ن

گاه گؤره ن حافظ-ی شیراز ایله بالکاندا دوروبلار
گاه گؤره ن اورتادا شطرنج قورارکن اوتوروبلار
گاه گؤره ن سازیله، آوازیله ائیله نجه قوروبلار
سانکی ساغر ده ووروبلار

خاجه الحان اوخویاندا، هامی ایشدن دایانیرلار
او نوالرله پریلر گاه اویوب گاه اویانیرلار
لاله لر شٶعله سی، الوان شیشه رنگی بویانیرلار
نه خومار گؤزلو یانیرلار

قاناد ایسته ر بو اوفوق، قوی قالا ترلانلی سهند´یم
ائشیت اؤز قیصصه می، دستانیمی، دستانلی سهند´یم
سنی حئیدر بابا او نعره لر ایله چاغیراندا
او سفیل داردا قالان تولکو قووان شئر باغیراندا
شئیطانین شیللاغا قالخان قاتیری نوخدا قیراندا
بابا قورقور (؟) سسین آلدیم، دئدیم آرخامدی، ایناندیم
آرخا دوردوقدا سهند´یم ساوالان تک هاوالاندیم
سئله قارشی قووالاندیم

جوشقون´ون دا قانی داشدی، منه بیر هایلی سس اولدو
هر سسیز بیر نفس اولدو
باکی داغلاری دا، های وئردی سسه، قیها اوجالدی
او تایین نعره سی سانکی بو تایدان دا باج آلدی
قورد آجالدیقدا قوجالدی

راحیم´ین نعره سی قووزاندی، دییه ن توپلار آتیلدی
سئل گلیب نهره قاتیلدی
روستم´ین توپلاری سسله ندی، دییه ن بوملار آچیلدی
بیزه گول-غونچا ساچیلدی

قورخما گلدیم دییه، سسلرده منه جان دئدی قارداش
منه جان-جان دییه ره ک، دوشمنه قان-قان دئدی قارداش
شهرییار سؤیله مه دن گاه منه سولطان دئدی قارداش
من ده جانیم چیغیریب: جان سنه قوربان دئدی قارداش
یاشا اوغلان سیزه داغ-داش دلی جئیران دئدی قارداش
ائل، سیزه قافلان دئدی قارداش
داغ، سیزه آسلان دئدی قارداش

داغلی حئیدربابا´نین آرخاسی هر یئرده داغ اولدو
داغا داغلار دایاق اولدو
آراز´یم آینا-چیراق قویمادا،آیدین شافاق اولدو
او تایین نغمه سی قووزاندی، اوره کلر قولاق اولدو
یئنه قارداش دییه ره ک قاچمادا باشلار آیاق اولدو
قاچدیق، اوزله شدیک آرازدا، یئنه گؤزلر بولاق اولدو
یئنه غملر قالاق اولدو
یئنه قارداش سایاغی سؤزلریمیز بیر سایاق اولدو
وصل اییین آلمادا، ال چاتمادی عئشقیم داماق اولدو
هله لیک غم سارالارکن قارالار دؤندو آغ اولدو
آراز´ین سو گؤلو داشدی، قایالیقلار دا باغ اولدو
ساری سونبوللره زولف ایچره اوراقلار داراق اولدو
یونجالیقلار یئنه بیلدیرچینه یای-یاز یاتاق اولدو
گؤزده یاشلار چیراق اولدو
لاله بیتدی یاناق اولدو
غونچا گولدو، دوداق اولدو
نه سول اولدو، نه ساغ اولدو

ائلیمی آرخامی گؤردوکده ظالیم اووچو قیسیلدی
سئل کیمی ظولمو باسیلدی، زینه آرخ اولدو، کسیلدی
گول گؤزوندن یاشی سیلدی
تور قوران اووچو آتین قوومادا سیندی، گئری قالدی
اؤزو گئتدی، تورو قالدی

آمما حئیدربابا دا بیلدی کی، بیز تک هامی داغلار
باغلانیب قول-قولا زنجیرده، بولودلار اودور آغلار
نه بیلیم بلکه طبیعت اؤزو نامرده گون آغلار
ایری یوللاری آچارکن، دوز اولان قوللاری باغلار
صاف اولان سینه نی داغلار

داغلارین هر نه قوچو، ترلانی، جئیرانی، مارالی
هامی دوشگون، هامی پوزغون، سینه لر داغلی، یارالی
گول آچان یئرده سارالی

آمما ظن ائتمه کی، داغلار یئنه قالخان اولاجاقدیر
محشر اولماقدادی بونلار داها وولقان اولاجاقدیر
ظولم دونیاسی یانارکن ده تیلیت قان اولاجاقدیر
وای ...! نه توفان اولاجاقدیر

دردیمیز سانما کی، بیر تبریز-و تئهران´دیر عزیزیم
یا کی، بیز تورک´ه جهننم اولان ایران´دیر عزیزیم
یوخ بو دین داعواسیدیر، دونیا تیلیت قاندیر عزیزیم
تورک اولا، فارس اولا دوزلوک داها تالاندیر عزیزیم
بیز آتان دیندیر، آتان دا بیزی ایماندیر عزیزیم
سامیری مروتد ائدیب هه نه (؟) موسلماندیر عزیزیم
اوممه تین هارون´و من تک، له له گیریاندی عزیزم
هر طرفدن قیلیج ائندیرسه لر (؟) قالخاندیر عزیزیم
بیر بیزیم درمانیمیز موسی-یی عیمران´دیر عزیزیم
گله جک شوبهه سی یوخ، آیه-یی قورآندیر عزیزیم
او هامی دردلره درماندیر عزیزیم

دوقتور اولدوقدا بشر بو یارانی ساغلاماق اولماز
اولماسا آللاه الی دین مرضین چاغلاماق اولماز
داغلاماق دا علاج اولسا بیر ائلی داغلاماق اولماز
دینی آتمیش ائله یاوروم داها بئل باغلاماق اولماز
او گولوب آغلایا دا، اونلا گولوب آغلاماق اولماز
شئیطانی یاغلاماق اولماز

دئدین: آذر ائلینین بیر یارالی نیسگیلییه م من
نیسگیل اولسام دا گولوم بیر ابدی سئوگیلییه م من
ائل منی آتسا دا اؤز گوللریمین بولبولویه م من
ائلیمین فارسیجا دا دردینی سؤیله ر دیلییه م من
دینه دوغرو نه قارانلیق ایسه ائل مشعلییه م من
ادبییات گولویه م من

نیسگیل اول چرچییه قالسین کی جواهیر نه دی قانمیر
مدنییت دبین ائیلیر بدوییت، بیر اوتانمیر
گون گئدیر آز قالا باتسین گئجه سیندن بیر اویانمیر
بیر اؤز احوالینا یانمیر

آتار اینسانلیغی آمما یالان انسابی آتانماز
فیتنه قووزانماسا بیر گون گئجه آسوده یاتانماز
باشی باشلارا قاتانماز

آمما مندن ساری، سن آرخایین اول شانلی سهند´یم
دلی جئیرانلی سهند´یم
من داها عرش-ی اعلا کؤلگه سی تک باشدا تاجیم وار
الده فیرعون´ا قنیم بیر آغاجیم وار
حرجیم یوخ، فرجیم وار

من علی اوغلویام، آزاده لرین مرد-و مورادی
او قارانلیقلارا مشعل
او ایشیقلیقلارا هادی
حاققا، ایمانا مونادی

باشدا سینماز سیپریم، الده کوته لمه ز قیلیجیم وار

سون

آتا شهریار


1390/06/10

Səhəndin ölümünə

   یازان: araz azeri turk    بولوم :شهریارşəhryar ،

Səhəndin ölümünə

Məhəmməd Hüseyn şəhriyar

Bu qara torpağa giciyim gəlir

Günbəgün artır öz xəzinəsin

O necə basıbdır qara bağrına

Səhənd tək bir dolu söz xəzinəsin

O yüksək səhəndin özü ölübsə

Sızlayan sazının sözü bizdədir

Dumanlı zirvəsi gözdən itibsə

Ruhun intizar gözü bizdədir

 

Son

سهندین اؤلومونه

محمد حسین شهریار

بو قارا تورپاغا گیجیگیم گلیر

گونبگون آرتیر اؤز خزینه‌سین

او نئجه باسیب‌دیر قارا باغرینا

سهند تک بیر دولو سؤز خزینه‌سین

او یوکسک سهندین اؤزو اؤلوبسه

سیزلایان سازینین سؤزو بیزده‌دیر

دومان‌لی زیروه‌سی گؤزدن ایتیبسه

روحون اینتیزار گؤزو بیزده‌دیر

 

سون


1390/06/10

Şair qardaşım Şəhriyara məktub

   یازان: araz azeri turk    بولوم :شهریارşəhryar ،

Şair qardaşım Şəhriyara məktub
Haqqım deyə ellər qalxıb ayağa,
Səsin gəlmir, ay Şəhriyar, hardasan?
Ayıl barı güllələrin səsinə,
Millətin min dərdi var, hardasan?!

Mən uzaqdan görürəm bu dəhşəti
Sən yaxından görmürsən vəhşəti?
Düşmən yenə nişan alıb milləti
Meydanlarda axır qanlar, hardasan?

Alqışlardım bir zaman hər kəlməni,
Səbəb nədir eşitmirəm nəğməni?
Gör haçandır, gör haçandır mən səni
Axtarıram diyar, diyar, hardasan?

Od tutaraq alışardım, şerinlə,
Ədalətdən danşardım şerinlə.
Al günlərçün çalışardım şerinlə,
De hardasan, ey sənətkar, hardasan?

Yağdırmasan lənətini cəllada,
Bildirməsən qüdrətini cəllada,
Göstərməsən qeyrətini cəllada
Etməz sənə el ehtibar, hardasan?!

Qəm yelkənim dənizdədir haçandır,
Yarı canım Təbrizdədi, haçandır.
Təbrizdədir, o sizdədir haçandır,
De hardasan, ey nəğməkar, hardasan?

Öz andını çıxartma gəl yadından,
Atəş yağdır ürəyinin odundan.
Qardaş kimi, vətən, millət adından
Var səsimlə çəkirəm car, hardasan?!

Çox da bu gün, bu dəm özüm burdayam
Ellər bilir, ürəyimlə hardayam.
Süleymanam, söz ordumla ordayam.
Bəs sən özün, ey Şəhriyar, hardasan?!

Süleyman Rüstəm, noyabr, 1980.




Süleyman Rüstəmə savab

Gün çırtadı, göz qamaşdı,
Araz mənlə fosunlaşdı
Eşqim ayaqyalın qaçdı,
Sənin gəldi, Süleymanım!

Sənə qurban mənim canım,
Mən ölmüşəm, ağlayan yox,
Gözlərimi bağlayan yox,
Bir od yaxıb dağlayan yox,

Soyuq bizi kiridibdir,
Şaxta bizi qurudubdur.
Neftimizi basdırırlar,
Millətə qan qusdururlar.

Bir iddəyə qısdırırlar,
Qalan qalır ac-susuz,
Cavandırsa, acdır quduz.
40 ildir ki, dusdağam mən.

Qərarlar icra ağam mən,
Deyirsən bəki, sağam mən?
Bağırmadan iş qurtulub,
Boğaz, bağırsaq yırtılub.

Bir əl silah, bir əl yalın,
Biri tünük, biri qalın,
Deyir ki, haqqızı alım,
Amma hansı kömək ilə?

Yemək olur demək ilə?!
...böyük başlardır təqsirkar,
kiçik başda nə təqsir var?
Yenə arteş dura havar,
Millətin də işi işdir,
Yoxsa dava mərkimişdir.

Qorxum budur oyun ola,
Millət dönə qoyun ola.
Kimdir öizə boyun ola?
Ki, qurdu biz qova bilək,
Qurdun şərin sova bilək?

...amma bizim mücahidlər,
hər biri min cana dəyər.
Topa, tanka baxar məyər?
Qan-qan deyib, hayxırması,
Acıqlı bir şir balası.

...biz bir dərya qan vermişik,
zindanlarla can vermişik,
40 nəsil qurban vermişik –
Şəriəti tək insanlar,
Təxti kimi pəhləvanlar.

Biz etisab etdik tamam,
əliyalın etdik qiyam.
Qoyun qəli, Naib-imam
Cahad desə, dartılaruq,
Qırılsaq da, qurtularuq.

...Səsin mənə nə səs oldu,
qəbir yenə qəfəs oldu.
Bir balaca həvəs oldu,
Dedim yenə durum yazım,
Yenə də bir qəbir qazım.

Hardan belə səsin gəlsin,
Gözümüzün yaşın ilsin,
Mənim də bir üzüm gülsün.
Haçan səni görə billəm?
Qol boynuva herə billəm?

Qardaşların gözündən öp,
Bəxtiyarın üzündən öp,
Səmədin də sözündən öp.
Mən də təkəm, sizə qurban,
Tək canım, hammuza qurban!

 

شاعر قارداشیم شهریارا مکتوب

 

حاقیم دئیه ائللر قالخیب آیاغا،

سسین گلمیر، آی شهریار، هارداسان؟

آییل باری گولله‌لرین سسینه،

میللتین مین دردی وار، هارداسان؟!

 

من اوزاق‌دان گؤرورم بو دهشتی

سن یاخین‌دان گؤرمورسن وهشتی؟

دوشمن یئنه نیشان آلیب میللتی

میدان‌لاردا آخیر قان‌لار، هارداسان؟

 

آلقیشلاردیم بیر زامان هر کلمنی،

سبب ندیر ائشیتمیرم نغمنی؟

گؤر هاچان‌دیر، گؤر هاچان‌دیر من سنی

آختاریرام دیار، دیار، هارداسان؟

 

اود توتا‌راق آلیشاردیم، شعرینله،

عدالت‌دن دانشاردیم شعرینله.

آل گونلرچون چالیشاردیم شعرینله،

دئ هارداسان، ائی سنتکار، هارداسان؟

 

یاغدیرماسان لنتینی جللادا،

بیلدیرمه‌سن قودرتینی جللادا،

گؤسترمه‌سن قئیرتینی جللادا

ائتمز سنه ائل ائهتیبار، هارداسان؟!

 

قم یئلکنیم دنیزده‌دیر هاچان‌دیر،

یاری جانیم تبریزده‌دی، هاچان‌دیر.

تبریزده‌دیر، او سیزده‌دیر هاچان‌دیر،

دئ هارداسان، ائی نغمکار، هارداسان؟

 

اؤز آندینی چیخارتما گل یادین‌دان،

آتش یاغ‌دیر اوریی‌نین اودون‌دان.

قارداش کیمی، وطن، میللت آدین‌دان

وار سسیمله چکیرم جار، هارداسان؟!

 

چوخ دا بو گون، بو دم اؤزوم بوردایام

ائللر بیلیر، اورییمله هاردایام.

سولئیمانام، سؤز اوردوملا اوردایام.

بس سن اؤزون، ائی شهریار، هارداسان؟!

 

سولئیمان روستم، نویابر، 1980.

 

 

 

 

سولئیمان روستمه ساواب

 

گون چیرتادی، گؤز قاماشدی،

آراز منله فوسونلاشدی

عشقیم آیاقیالین قاچدی،

سنین گلدی، سولئیمانیم!

 

سنه قوربان منیم جانیم،

من اؤلموشم، آغلایان یوخ،

گؤزلریمی باغلایان یوخ،

بیر اود یاخیب داغلایان یوخ،

 

سویوق بیزی کیریدیب‌دیر،

شاختا بیزی قورودوب‌دور.

نئفتیمیزی باسدیریرلار،

میللته قان قوسدورورلار.

 

بیر ایدده‌یه قیسدیریرلار،

قالان قالیر آج-سوسوز،

جاوان‌دیرسا، آجدیر قودوز.

40 ایلدیر کی، دوسداغام من.

 

قرارلار ایجرا آغام من،

دئییرسن بکی، ساغام من؟

باغیرما‌دان ایش قورتولوب،

بوغاز، باغیرساق ییرتیلوب.

 

بیر ال سلاح، بیر ال یالین،

بیری تونوک، بیری قالین،

دئییر کی، هاققیزی آلیم،

اما هانسی کؤمک ایله؟

 

یئمک اولور دئمک ایله؟!

...بؤیوک باش‌لاردیر تقسیرکار،

کیچیک باشدا نه تقسیر وار؟

یئنه آرتئش دورا هاوار،

میللتین ده ایشی ایشدیر،

یوخسا داوا مرکیمیش‌دیر.

 

قورخوم بودور اویون اولا،

میللت دؤنه قویون اولا.

کیم‌دیر اؤیزه بویون اولا؟

کی، قوردو بیز قووا بیلک،

قوردون شرین سووا بیلک؟

 

...اما بیزیم موجاهیدلر،

هر بیری مین جانا دیر.

توپا، تانکا باخار میر؟

قان-قان دئییب، هایخیرماسی،

آجیق‌لی بیر شیر بالاسی.

 

...بیز بیر دریا قان وئرمیشیک،

زین‌دان‌لارلا جان وئرمیشیک،

40 نسیل قوربان وئرمیشیک

شریعتی تک اینسان‌لار،

تختی کیمی پهلوان‌لار.

 

بیز ائتیساب ائتدیک تامام،

الیالین ائتدیک قیام.

قویون قلی، نایب-ایمام

جاهاد دئسه، دارتیلاروق،

قیریلساق دا، قورتولاروق.

 

...سسین منه نه سس اولدو،

قبیر یئنه قفس اولدو.

بیر بالاجا هوس اولدو،

دئدیم یئنه دوروم یازیم،

یئنه ده بیر قبیر قازیم.

 

هاردان بئله سسین گلسین،

گؤزوموزون یاشین ایلسین،

منیم ده بیر اوزوم گولسون.

هاچان سنی گؤره بیللم؟

قول بوینووا هئره بیللم؟

 

قارداش‌لارین گؤزون‌دن اؤپ،

بختیارین اوزون‌دن اؤپ،

سمدین ده سؤزون‌دن اؤپ.

من ده تکم، سیزه قوربان،

تک جانیم، هامموزا قوربان!


1390/06/10

Şatr oğlan

   یازان: araz azeri turk    بولوم :شهریارşəhryar ،

Şatr oğlan

Şatr oğlan görum allah sənə versin bərəkət

Qoy unun yaxşi ələnsin , xəmirin əllənsin

Çox pişir yaxşi pişir göydə fırıldat kürəyi

Mənbər üstə çörəyin qoy qalanib təllənsin

Təndirin tuur təkin ərşidən alsin işiği

Ərsinin beyrəq-i əhrar kimi millənsin

Kasıbın qisməti yox yağli pilov döşləmağa

Bu yavan səngəyi bir qoy sahalib səllənsin

Qeyrətin qurbani sən müştərini tez yola sal

El içində yaramaz arvaduşax vellənsin

Qoy ikir yalliği satsin xozəyin bir manata

Dişi düşmüş qocanin ağzi nədir dillənsin

O mənim şe,rimə çox mayil olan vərdəstə

Denə , şa,ir çörəyi qoy qurusun güllənsin

Mən liğirsa yiyəbilsəmdə fulus lazm olar

Bu susuz baxca nə lazım bu qədər bellənsin

Sari yazlıxdan olan gülli qızarmış səngək

Gərəy ağzında ərik tək əzilib həllənsin

Tehranın qeyrıti yox şəhriyarı saxlamağa

Qaçmışam tırbizə ta yaxşı yaman billənsin

Baxcamız fasid olub hər nə əkirsən olmaz

Yeri daşlıxdı gərək torpağı qərbillənsin

Moddəası çox olan təbl-e tohi por badux

Neyliyək zırnaçinin burnu gərək yellənsin

Bu gicəllənmədən ay çərx-i fələk səndə yorul

Bu həyasız günə gözlər nə qədər zillənsin

Sə,dinin bag-i Golestanı gərək həşrə qədər

Alması səllələnıb xurması zənbillənsin

Lə,nət ol bad-i xəzanə ki nizami bağının

Bir yava gülbəsərin qoymadı kakillənsin

Aarezu cəlgələrində biz əkən məzrəələr

Diyəsən saqələnib qoy hələ sünbüllənsin

Qissə çox qafiyə yox axtarıram tapmiyuram

Yeridir şəhriyarın təb,idə tənbəllənsin

Ata şəhriyar

شاطر اوغلان

شاطر اوغلان گوروم آللاه سنه وئرسین برکت

قوی اونون یاخشی النسین ،خمیرین اللنسین

چوخ پیشیر یاخشی پیشیر گویده قیریلدات کوره یی

منبر اوسته چوره یین قوی قالانیب تللنسین

تندیرین طور تکین عرشیده ن آلسین ایشیغی

ارسینین بیرق احرار کیمی میللنسین

کاسیبین قیسمتی یوخ یاغلی پیلوو دوشله ماغا

بو یاوان سنگه یی  بیرقوی ساحالیب سئللنسین

قیرتین قوربانی سن موشترینی تئز یولا سال

ائل ایچینده یاراماز آرواد اوشاغ وئللنسین

قوی ایکیریاللیغی ساتسین خوزه ئین بیر ماناتا

دیشی دوشموش قوجانین آغزی نه دیر دیللنسین

او منیم شعریمه چوخ ماییل اولان وردسته

دئنه: شاعیر چوره یی قوی قوروسون گوللنسین

من لیغیرسا یئیه بیلسم ده  فلوس لازیم اولار

بو سوسوز باخچا نه لازیم بو قده ربئللنسین

ساری یازلیقدان اولان گوللی قیزارمیش سنگک

گره ک آغزوندا اریک تک ازیلیب هللنسین

تهرانین غیرتی یوخ شهریار ساخلاماغا

قاچمشام تربیزه تا یاخشی یامان بللنسین

باغچامیز فاسد اولوب ، هر نه ااكرسن اولماز

یئری داشلیقدی گره ك توپراقی غربیللنسین

مدعاسی چوخ اولان طبل تهی پربادوخ

نیله یك ضرناچی نین بورنو گره ك یئلله نسین

بو گیجللنمه دن آی چرخ فلك سنده یورول

بو حیاسیز گونه گوزلر نه قده ر زیللنسین

سعدی نین باغ گلستانی گره ك حشره قده ر

آلماسی سلله لنیب خرماسی زنبیللنسین

لعنت اول باد خزانه كی "نظامی " باغینین

بیر یاوا گلبسرین قویمادی كاكللنسین

آرزو جلگه لرینده بیز اكن مزرعه لر

دئییه سن ساقه لنیب قوی هله سنبللنسین

قصه چوخ قافیه یوخ آختاریرام تاپمیورام

یئریدیر شهریارین طبعی ده تنبللنسین

آتا شهریار

 

 


1390/06/10

qəm basdı qəlyanımı

   یازان: araz azeri turk    بولوم :شهریارşəhryar ،

qəm basdı  qəlyanımı

qişin qərə qeyidi alıb mənim canımı

xurtdan deyib qucalıq  ,  kəsib mənim yanımı

 

bu sıqarda zülük tək  ,  düşüb mənim canıma

dodaq  -  dodaqə qoyub  ,  sorur mənim qanımı

 

sazaq sazın quraraq  ,  qulaxdı sankı burur

çəkibdi ipliyimi ,  qırıbdı qeytanımı

 

yenə qışın qoşunu  ,  payız marşın çalaraq

kərdimdə varsa biçir  ,  laləmi reyhanımı

 

üşüdüm ha üşüdüm ,  deyir mənim dərdimi

kürsü tovun itirib  ,  axtarır dərmanımı

 

payızlamış zəmiyəm ,  vəryan mənənə gərək

dönərgə döndərəcək  ,  döndükcə vəryanımı

 

qoy çalxasın bizi bu  ,  zəmaanə nehrə kimi

mənim südüm çürüyüb  ,  turşatsın ayranımı

 

hənr dilin qələmin ışdən salan məni də

işdən salıb itirib pak adımı sanımı

 

heydərbaba yolu tək  ,  yol bağlanıb üzümə

avçı fəlk avlayıb sərvilə ceyranımı

 

nazlı yarım gedəli  ,  sönüb mənim çırağım

xan varsada nə karı  ,  evin ki yox xanımı

 

MƏRYƏM köçüb gedibn ŞƏHRZADınm da gedir

fələk əlımdən alır  ,  dürrümü mərcanımı

 

yetim tək oz  -  gözümi nibt basıb basacaq

yaman qarışdırıacaq  ,  səlqə mi  ,  səhmanımı

 

nə diz var ki sürünüm ,  nə üz varkı qayıdım

nə yük qalıb nə yabı  ,  soyubla kərvanımı

 

eldən məni qocalıq  ,  azqın salıb  ,  salacaq

itirdi TƏBRIZimi  ,  oduzdu TƏHRAnımı

 

bizim də çayxanamız  ,  çay tökrək qonağa

düldürdi zərdabilə  ,  mənim də fincanımı

 

qəlyanla ŞƏHRIARım qəmi qaldır baxalım

mən də xoruldadıram  ,  qəm basdı qəlıanımı

 

 

 

قه م باسدی  قه لیانیمی

قیشین قره قئییدی آلیب منیم جانیمی

خورتدان دئییب قوجالیق ، کسیب منیم یانیمی

 

بو سیگاردا زو لی تک ، دوشوب منیم جانیما

دوداق – دوداقه قویوب ، سورور منیم قانیمی

 

سازاق سازین قوراراق ، قولاقدی سانکی بورور

چکیبدی ایپلیگیمی ، قیریبدی قئیطانیمی

 

یئنه قیشین قوشونی ، پائیز مارشین چالاراق

کردیمده وارسا بیچیر ، لاله می ریحانیمی

 

اوشودوم ها اوشودوم، دئییر منیم دردیمی

کورسو تووین ایتیریب ، آختاریر درمانیمی

 

پاییزلامیش زمی یم، وریان منه نه گرک

دؤنرگه دؤندره جک ، دؤندیکجه وریانیمی

 

قوی چالخاسین بیزی بو ، زمانه ئهره کیمی

منیم سودوم چورویوب ، تورشاتسین آیرانیمی

 

هنر دیلین قلمین ایشدن سالان منی ده

ایشدن سالیب ایتیریب پاک ادیمی سانیمی

 

حیدربابا یولی تک ، یول باغلانیب اوزومه

آوچی فلک آولاییب سررویله جئیرانیمی

 

نازلی یاریم گئده لی ، سؤنوب منیم چیراغیم

خان وارسادا نه کاری ، ائوین کی یوخ خانیمی

 

مریم کؤچوب گئدیبن شهرزادینم دا گئدیر

فلک الیمدن آلیر ، درریمی مرجانیمی

 

یئتیم تک اوز – گؤزومی نیبت باسیب باساجاق

یامان قاریشدیریاجاق ، سلقه می ، سهمانیمی

 

نه دیز وار کی سورونوم، نه اوز وارکی قاییدیم

نه یوک قالیب نه یابی ، سویوبلا کروانیمی

 

ائلدن منی قئوجالیق ، آزقین سالیب ، سالاجاق

ایتیردی تبریزیم ، اودوزدو تهرانیمی

 

بیزیم ده چایخانامیز ، چای تؤکررک قوناغا

دولدوردی زردآب ایله ، منیم ده فنجانیمی

 

قلیانلا شهریاریم غمی قالدیر باقالیم

من ده خورولدادیرام ، غم باسدی قلیانیمی

 


یاپراغلارین سایی: 3 1 2 3